Nga Blerina Goce
K.L është 40 vjeç. Ai largohet pothuajse çdo ditë nga shtëpia për të punuar në ndërtim. Herë pas here ai duhet të ngjitet në lartësi të mëdha me shumë rrezik për jetën. Sa herë që shkon për të punuar në një pallatet në ndërtim në Tiranë, ai vë bast me jetën.
“Më duhet të punoj shumë kate lart mbi tokë. Shyqyr Zotit nuk kam pësuar gjë deri tani. Ne ngjitemi lart mbi skelë ndërsa punojmë, por nuk kemi asnjë masë tjetër sigurie”, tregon ai për gazetën “Si”.
Sipas të dhënave zyrtare, sektori më vrastar i ekonomisë mbetet ndërtimi, ndërsa pas tij vjen puna në minierë.
Vetëm disa ditë më parë, një 39 vjeçar nga Tirana me iniciale A.B u gjet i pajetë në një pallat në ndërtim tek zona e Medreses. Sipas të dhënave paraprake dyshohet se vdekja e tij u shkaktua si pasojë e kontaktit me rrymën elektrike.
Kjo ngjarje çoi në 22 numrin e atyre që kanë humbur jetën nga aksidentet në punë vetëm për 8 muajt e vitit 2020. Në 2019-ën, në vendin e punës janë aksidentuar 176 punëtorë, prej të cilëve 38 kanë humbur jetën.
Kurse në muajin gusht të këtij viti, në vetëm dy javë, tre punëtorë kanë humbur jetën në vendin e tyre të punës.
Inspektoriati Shtetëror i Punës I tha gazetës “Si” se tre rastet e fundit janë në hetim dhe për hetimin e tyre janë përfshirë edhe policia , prokuroria dhe për rastin e fundit të vdekjes së 39 vjeçarit, edhe Inspektoriati Shtetëror Teknik Industrial.
Tek aksidenti I parë në Tiranë, viktima ishte punëtorë tek kompania e ndërtimit “STAR CONSTRUCTION”. I ishte roje pune dhe është gjendur i pajetë në katin e dytë.
Inspektoriati thotë se ka pezulluar punën e kompanisë në katet -1 dhe -2 deri në rregullimin e situatës dhe pajisjes me parmakë mbrojtëse të të gjitha shkallëve zbritëse . Nga kontrolli u vërejt se katër shkallë hyrëse nga 12 gjithsej në katet -1 dhe -2, janë pa parmakë mbrojtës, ndërsa aksidenti mendohet të ketë ndodhur në një nga këto shkallë.
Megjithatë, shkaqet determinante të aksidentit janë ende të panjohura, “arsye për të cilën, sipas Inspektoriatit të Punës, “po bashkëpunohet me organet e policisë dhe të Prokurorisë”. Për momentin, subjekti është në proces inspektimi mbi hetimin administrativ të ngjarjes.
Aksidenti i dytë me pasojë vdekje ka ndodhur në Elbasan tek kompania e prodhimit të materialeve të ndërtimit “Mikel 92. Shkak i aksidentit është përcaktuar “Moszbatimi i rregullave të sigurimit teknik, mungesa e masave kolektive dhe individuale mbrojtëse”.
Subjektit iu pezullua puna në makinerinë e betonit. Inspetoriati I Punës thotë se “aktiviteti përbën rrezikshmëri të menjëhershme, të rëndë dhe të paevitueshme për sigurinë dhe shëndetin e punëmarrësve”.
Ndërsa aksidenti i tretë me pasojë vdekjen ndodhi në Tiranë, në subjektin “Vladen Elezi”. Aksidenti ka ndodhur në Rrugën e Dibrës në një objekt në ndërtim, afër kopshtit nr. 6.
Sipas konstatimeve të Inspektoriatit “ punëtorit, gjatë kryerjes së detyrës, duke bërë prerje të hekurave i është bllokuar makineria e tranxhës. I aksidentuari është afruar për të bërë regulllimin e rrymës elektrike dhe në këtë moment ka ndodhur kontakti fatal, duke e zënë korenti, gjë që ka sjellë dhe vdekjen e menjëhershme të punëmarrësit”.
Inspektoriati ka ndërprerë aktivitetin e biznesit deri sa kompania të rivendos masat e sigurise duke rregulluar kabllot elektrike, të vendosë skeleritë. Megjithatë kjo ngjarje po hetohet edhe nga policia dhe prokuroria.
Por aksidenti në fjalë duket si ishte I paparashikuar që më parë. Sipas informacionit nga vetë Inspektoriati i Punës (ISHPSHSH), subjektet e përfshira në aksident ishin inspektuar edhe shkeljet ishin vërjetur që më parë…
Pikërisht për këtë arsye, disa aktivistë të Organizatës Politike organizuan disa ditë më parë një protest në mjediset e Inspektoriatit Shtetëror të Punës.
“Shumica e të plagosurve dhe të vdekurve në punë i përkasin sektorit të ndërtimit dhe minierave. Ndërkohë hetimet, arrestimet dhe zbatimi i ligjit vijojnë të mbetet i papërfillshëm. Ne protestojmë ndaj indiferencës së këtij institucioni për të garantuar jetën dhe shëndetin e punëtorëve. Zyrat i gjetëm bosh, ndërkohë që një pjesë e zyrtarëve shulloheshin në kafenenë ngjitur, prej ku njëri syresh, me pamje dhe sjellje halabaku partiak, guxoi të ngrejë dorë ndaj aktivistëve.”,- thanë aktivistët e OP.
Që nga fillimi i vitit ka patur 89 aksidente në punë.
Sipas OP, “Në të gjitha rastet jeta dhe shëndeti i punëtorëve janë sakrifikuar. për fitimin e një grushti të privilegjuarish të pangopshëm. Epshi i oligarkëve për fitime të shpejta e të mëdha nuk po shkatërron thjesht urbanistikën dhe jetueshmërinë e qytetit, por mbi të gjitha po u merr jetën gjithnjë e më shumë punëtorëve, të cilët nuk kanë asnjë mundësi zgjedhjeje përtej binomit të frikshëm: uri prej papunësisë ose rrezik vdekjeje nga puna. Kjo situatë nuk është e rastësishme.”
Numri i të aksidentuarve në vendin e punës rritet vit pas viti. Më 2018 u regjistruan 27 të vdekur, ndërsa në vitin 2019 numri i të vdekurve në vendin e punës arriti shifrën 38.
Sipas të dhënave zyrtare, në periudhën janar-gusht kanë humbur jetën 22 punëtorë në vendin e punës, afërsisht 3 punëtorë në muaj.