Pak ditë pasi Top Story zbuloi se banda e Niklës ka qenë një prej grupeve të dyshuara për eliminimin e bankierit Artan Santo, RENEA zhvilloi një aksion blic me urdhër të SPAK në shtëpitë e 7 të fortëve në Fushë-Krujë.
Kontrolle u ushtruan në banesat e Durim Bamit, Valter Bamit, Bedri Hakës, Marklen Hakës, Gentjan Koçit, Ylli Çangut dhe Ervin Kodrës.
Siç konstatohet në dosjen hetimore, pikërisht dy prej pjestarëve të këtij grupi që u goditen sot nga RENEA, janë mbajtur nën vëzhgim gjatë hetimeve për vrasjen e bankierit, edhe pse ende nuk janë gjetur prova bindëse.
Bëhet fjalë për Valter Bamin, vëllain e Durim Bamit, dhe Mariglen Hakën, të cilët i janë nënshtruar vazhdimisht përgjimeve telefonike dhe atyre ambientale.https://www.youtube.com/embed/OrfyRmJbVKQ
Dyshimet për lidhjen e bandës me vrasjen e Santos
Një prej grupeve që dyshohet për ekzekutimit e bankierit, ngjarje e cila është ende e pazbardhur, është edhe grupi i të fortëve të Niklës.
Gazetari Artan Hoxha dha (gjatë emisionit të Top Story kushtuar vrasjes së bankierit) indicie për një prej personave të dyshuar si ekzekutor, konkretisht për Enver Stafukën.
“Personi që ka bërë qitjen me informacionin që kam unë, më pas është rrëmbyer dhe është zhdukur, është personazh që rezulton i përfshirë në seri ngjarjesh të rëndësishme në Shqipëri. Ka një variant që ky para se të ekzekutohej e zhdukej është filmuar me kamer, është torturuar për të treguar e pastaj është ekzekutuar e zhdukur kufoma, gjatë torturave ka treguar lidhjen me 31 ngjarje” u shpreh gazetari Artan Hoxha.
Personi për të cilin është folur disa herë është Enver Stafuka nga Fushë Kruja. Ai është person i dyshuar për disa vepra penale.
Zhdukja e të dyshuarit si ekzekutor
Stafuka është rrëmbyer në 8 Shkurt të vitit 2015 në qendër të Fushë Krujës nga disa persona të maskuar si police, ndërsa trupi i tij nuk u gjet kurrë. Ai ka pasur një çështje penale që lidhej me procesin për vrasjen e kryekomisarit Dritan Lamaj. Stafuka, kishte grabitur makinën e përdorur në krim nga biznesmeni Arben Frroku. Për rrëmbimin e tij është dyshuar një grup i fuqishëm kriminal i akuzuar për gjobëvënie dhe vrasje, por kurrë nuk janë siguruar të dhëna të mjaftueshme.
Vetë familjarët e Stafukës kanë akuzuar hapur për zhdukjen e Enverit shokun e tij Durim Bami. Në dëshmitë e dhëna në prokurori, ata kanë deklaruar se Enverin e zhdukën pasi kishte informacion për dhjetëra krime.