Nga Elton Koka
Prej më shumë se 1 viti ka nisur një fushatë mediatike kundër Ben Blushit nga disa personazhe politike të biznesit dhe medias.
Nga një kqyrje e thjeshtë titujsh në Google, rezulton se Blushi është njeriu më i sulmuar gjatë vitit 2020 me më shumë se 500 tituj portalesh kundër tij, çka është e pazakontë për një drejtues mediash.
Arsyet, siç thuhet, janë të ndryshme. Ben Blushi sulmohet nga rivalët konkurrentë të cilët e akuzojnë se ju ka marrë tregun e reklamave dhe influencës me ndryshimet që i ka bërë programacionit dhe administrimit të Top Channel.
Vetëm në dy vitet e fundit Top Channel ka ndalur humbjen, duke rritur një pjesë të pagave të figurave kryesore të ekranit dhe duke shtuar investimet në teknologji dhe studio.
Një segmet tjetër që frymëzon dhe sponsorizon sulmet ndaj Ben Blushit janë ish ortakët e Top Channel, të cilët mbetëm jashtë çdo influence në televizion me ardhjen e tij në krye të Top.
Natyrisht një pjesë të mirë të sulmeve i ka marrë përsipër vetë Sali Berisha, i cili ka më shpesh se një herë në 2-3 ditë akuza për Blushin, të të gjitha llojeve.
Mendohet se Sali Berisha është shumë i acaruar pasi Top Channel realizoi dokumentarë Top Story, me tre seri për implikimin direkt të Berishës në përplasjet me fisin e Haklajve.
Mirëpo si në çdo betejë, edhe në këtë rast duket se kundërshtarët e Ben Blushit nuk ishin të qetë pa krijuar një front të brendshëm beteje dhe konflikti brenda Top Channel.
Në gjashtë muajt e fundit ky front u gjet tek Portokallia përmes regjisorit të saj, Altin Basha.
Ky i përdori disa aktorë duke i rreshtuar në betejën kundër Blushit. Në 6 muaj titujt se Portokallia do ikte nga Top Channel, u mbushën portalet dhe janë me qindra tituj që lajmëronin dorëheqjet e aktorëve Salsano Rrapi, Marin Orhanasi, Gaz Paja, ku në fakt asnjëri prej tyre nuk u dorëhoq zyrtarisht në Top Channel.
Vetë Altin Basha i nxiste aktorët që të krijonin pasiguri, duke i çuar në takime me pronare televizionesh të tjera. Altin Basha arriti deri aty sa kërkoi ta kthente Portokalli në një kabare me pagesë, ku njerëzit të hanin e të pinin duke parë aktorët që luanin në skenë.
Është pak të thuash se Altin Basha nuk u rreshtua me koshiencë në frontin kundër Ben Blushit. Disa thone se mori premtime të mëdha për Vila në bregdet, disa të tjerë thonë se është joshur me favore.
Megjithatë, ai e bëri mirë punën që ju ngarkua, të prodhonte sa më shumë pasiguri dhe të furnizonte portalet kundër Ben Blushit. Në një kuptim u përdor si një “Kalë Troje”, pavarësisht se përfundoi si një “Ngjalë Troje”.
Askush nga aktorët nuk u largua nga Portokalli dhe vetë Altin Basha që kishte kërcënuar me shkatërrim, largim dhe sabotim u kthye në punë si zakonisht, duke belbëzuar këngën “Triste Domenica”.
U përdor për të furnizuar portalet dhe kaq. Rebelimi “Portokalli” kundër Ben Blushit u mbyll dhe pati vetëm një viktimë. Ajo quhet Xhemile Shehu, humoristja gazifikuese që u përdor nga kolegët e vetë, të cilët në fund e tradhëtuan duke e lënë të vazhdojë aktrimin në palestrën e Kodrës së Diellit.
Si çdo rebelim i sponsorizuar me para, edhe ky pati pak viktima dhe shumë poshtërim për ata që e organizuan.
