Një ditë pas marrjes në pyetje të ish-ministrit të Shëndetësisë Ilir Beqaj mësohet qëndrimi i tij përpara dy prokurorëve Ened Nakuçi dhe Edvin Kondoli.
Beqaj ka deklaruar se “ka zbatuar të gjitha detyrimet për aq sa i lejon ligji për dhënien e koncesionit”. Sipas tij koncesioni është dhënë kundrejt të gjitha procedurave ligjore.
I pyetur për lidhjen që ka me biznesmenin që fitoi tenderin me vlerë 100 mln dollarë për sterilizimin e pajisjeve kirurgjikale, Beqaj mohoi të ketë njohje apo lidhje shoqërore me të.
Hetuesit konfirmojnë se Beqaj ka dhënë dëshmi si person që ka dijeni për dhënien e koncesionit dhe ndaj tij deri më tani, nuk është regjistruar ndonjë procedim penal apo hetim. Beqaj u mor në pyetje një ditë më parë, ku qëndroi për më shumë se 9 orë në SPAK.
Në një intervistë për emisionin Shqip nga Rudina Xhunga, pak kohë më parë, i pyetur pikërisht për PPP-në e sterilizmit, Beqaj është përgjigjur se është krenar për këtë PPP, pasi sipas tij kjo ka sjellë revolucion në shëndetësinë shqiptare.
“Ato tre PPP-të e famshme, për mua kanë bërë revolucion në shëndetësinë shqiptare. PPP-ja e sterilizimit ka bërë revolucion në kirurgjinë shqiptare.
Ka standart modern nga Tropoja, në QSUT, në Sarandë dhe falë asaj kontrate çdo njeri rri dy ditë më pak në spital. Minimalisht i kushton shtetit 200 dollarë më pak çdo shtrim në spital”, u shpreh Beqaj.
Hetimi për sterilizimin nisi 3 vite më parë pas kallëzimit të nismës “Thurje” për akuzat e shpërdorimit të detyrës, korrupsionit dhe shkeljes së pabarazisë në tendera për këtë çështje në pyetje deri më tani janë marrë rreth 20 persona mes të cilëve ish-ministri Shëndetësisë, mjekë, dhe anëtarë të komisionit të vlerësimit të ofertave si dhe zyrtarë të tjerë të ministrisë.